गुल्मी। २५ जना कैदीबन्दी राख्न सक्ने क्षमता रहेको जिल्ला कारागार गुल्मीमा क्षमताभन्दा चार गुणाभन्दा बढी कैदीबन्दी हुँदा कारागार व्यवस्थापनमा समस्या भएकाे छ । जिल्ला कारागार कार्यालय गुल्मीका जेलर मेघप्रसाद पोखरेलका अनुसार ‘ङ’ वर्गको कारागारमा हाल एक सय नौ जना कैदीबन्दी रहेका छन् ।

उहाँका अनुसार २४ जना थुनुवा र ८५ जना कैदी छन् । कारागारमा पर्याप्त भवन, खेलमैदान साथै आयआर्जनका लागि उद्योग तथा सीपमूलक काम सञ्चालन गर्न पनि पर्याप्त ठाउँको अभाव रहेको उहाँको भनाइ छ ।

“कैदीबन्दीको इच्छा र चाहनाअनुसार सीप विकास तथा आयआर्जनका काम गर्ने वातावरण बनाउन पर्याप्त खाली ठाउँ छैन,” पोखरेलले भन्नुभयो, “कारागारमा पर्याप्त खेलमैदान, व्यवस्थित बासस्थान र उद्यम गर्न चाहने कैदीबन्दीका लागि आवश्यक व्यवस्था हुनुपर्छ ।”कारागारको भवन जीर्ण बन्दै गएको र पर्खालसमेत भत्किँदै जान थालेकाले सुरक्षा तथा बसोबासमा थप चुनौती उत्पन्न भएको उहाँले बताउनुभयो ।

यसैबिच, कारागारमा स्वास्थ्य सेवाको समस्या पनि विगतमा लामो समयसम्म रहेको थियो । तर पछिल्लो दुई वर्षदेखि उक्त समस्या समाधान भएपछि कारागारमै स्वास्थ्य परीक्षण हुने गरेको र कैदीबन्दीलाई स्वास्थ्य सेवा लिन सहज भएको जेलर पोखरेलले बताउनुभयो ।

नागरिक समाज गुल्मीका अध्यक्ष पदम पाण्डेले कारागारलाई सुधारगृहका रूपमा विकास गर्नुपर्नेमा जोड दिनुभयो । पछिल्लो समय जिल्ला कारागारमा केही सुधार भए पनि ती पर्याप्त नभएको भन्दै उहाँले राज्यले कारागारको भौतिक पूर्वाधार र कैदीबन्दीको आधारभूत आवश्यकतामा थप ध्यान दिनुपर्ने बताउनुभयो ।